الملحمه الشعريه الليبيه من انتـــــــــــــم ....؟

الملحمه الشعريه الليبيه من انتـــــــــــــم ....؟



بعد اثنان واربعون عاما خرج القذافي ليشتم ويقول

لاعظم شعب من انتـــــــــــــم ....؟


الشاعر . فرج المسماري

يقول فى رده


ما تعرف نحنا من نحنا؟

اسباب شقاك ..

انت وعيالك يا هرواك ..
هاضول ضنا عيسى الوكواك ..
تريس يظهر في وقت المحنة

نحنا هم همك ..
نحنا اللي نشفنا دمك ..
نحنا سباب كداك وغمك ..
ما تعرف نحنا من نحنا؟

اسباب همومك ..
نحنا اللي طيرنا نومك ..
نحنا كسارين خشومك ..
ما تعرف نحنا من نحنا؟

نحنا فرسان ..
اسباب هلاكك يا جبان ..
تريس عتل مانا جرذان ..
ويا ويلك كان تواجهنا

نحنا هل برقة ..
نحنا اللي درنالك حرقة ..
في جوفك تحذر ما ترقى ..
نين تعدي وتريحنا

نحنا مصراته ..
خشمك يا تافه واطاته ..
احنا ككلة واحنا الزناته ..
ما تعرف نحنا من نحنا؟

نحنا نالوت ..
مع الزاوية نسقيك الموت ..
هاضولا سيادك يا زلفوت ..
وما تعرف نحنا من نحنا؟

نحنا الرجبان ..
رجال فراسين وشجعان ..
نموتوا في وسط الميدان ..
ولا شكلك يرجع يحكمنا

نحنا فزان ..
اللي محاصرها يا جبان ..
اللي فيها زارع خيان ..
او بلفتنا تبي تفرقنا

الليبيين اللي في طرابلس منحازين ..
اللي محاصرها يا لعين ..
وبالقوة تبي تحكمنا

نحنا اللي ثرنا ..
من البيضا والمرج ودرنة
وبنغازي نين تحررنا ..
وما تعرف نحنا من نحنا؟
نحنا من طبرق من القبة وشحات ولبرق ..
وجيشك من شيح وشبرق ..
يللي في العالم فاضحنا

سبايب عارك ..
نقصف نين اندمر دارك ..
نين تهرب وتشيل صغارك ..
من ظلمك بيش تريحنا
ما تعرف نحنا من نحنا؟

...