بـنـغـازي ركـيـزة لـيـبـيـا لـوطـاحـت

..
بـنـغـازي ركـيـزة لـيـبـيـا لـوطـاحـت .. قـول لـيـبـيـا مـن بـيـن ديـنـا راحـت
..

بنغازي بداية الامر .. يوم خمسطاش اثنين كيف الجمر

شباب في ربيع العمر هان العمر .. بشاير الثورة في سماها لاحت

يسقط نضام الطاغية بالامر .. كل الحناجر صوت واحد صاحت

ويوم سبعطاش اسيول تشمر شمر.. الطاغي وضناه وزمرته استباحت

بنغازي احضنتها ليبيا بالغمر .. الله يربحك بيدك الغمة زاحت

..
بـنـغـازي ركـيـزة لـيـبـيـا لـوطـاحـت .. قـول لـيـبـيـا مـن بـيـن ديـنـا راحـت
..

بنغازي النسوم الشافي .. بنغازي اشبوب ركاح ركح سافي

بنغازي عطاتا درس ماهو خافي .. دون ليبيا لصقورها كي حاحت

كابوس كانت دوم للقذافي .. لاريحاتا يوم لااستراحت

انتصرت وتمت هي الحضن الدافي .. الكمين عيلة فالفيافي ذاحت

حنونة ودودة بالجفا ماتكافي .. من حنها عالوطن ياما ناحت

..
بـنـغـازي ركـيـزة لـيـبـيـا لـوطـاحـت .. قـول لـيـبـيـا مـن بـيـن ديـنـا راحـت
..

بنغازي عطت الاشارة .. يوم خمسطاش اثنين هي الشرارة

انفجرت كما بركان تصهد نارا .. وهدت اوكار الطاغية وارتاحت

جابر البيت ان ماح عندا مارا .. وهي ماسكة لازقزقت لا ماحت

فاربع ايام السو طار توارا .. وسيرة ضناها كل وطن اجتاحت

ضناها عطو الارواح موش اخسارة .. بنة ادماهم مسك منا فاحت

بنغازي كبيرة وقدرها الكبارة .. كلمة الحق اصدار بيها باحت

رباية الذايح للاعداء كسارة .. شمعة اتنير وعمرها ماساحت

..
بـنـغـازي ركـيـزة لـيـبـيـا لـوطـاحـت .. قـول لـيـبـيـا مـن بـيـن ديـنـا راحـت
..

للشاعر الكبير صلاح الغزال