قصيدة شيخ الشهداء عمر المختار

الشاعر محمد الشيخى


قصيدة شيخ الشهداء عمر المختار


فارس شهير اسمه عظيم اجهاده
ما من ثنا جابه ابلطش ازناده
...
فارس قليل مثيله
افدا ليبيا كافح اسنين طويله
على شانها حارب الظلم اويله
مؤمن عطاها الله قو ايراده
سيد الشلوق الطايبه السليله
السنده اللي لنعالها قناده
الجاسر اللي داسن سرايا خيله
الصفوف العدا يوم البلا ونكاده
...
فارس شهير امسمى
اتراب ليبيا غالى فداه ابدمه
اعداه حاصروه وفالمعاقل تمه
شعبه عليه اعلنوا حرب ايباده
ما عمر باتت دمعته فى كمه
ولا عمر طيّب نوم فوق اوساده
شديد باس يوم الباس " يرقى جمه "
ايمانه قوى صانه اتراب ابلاده
ضابط ظهر قنتير فاير دمه
يشاضا حديد ايديه فى ملهاده
عدوه على شط المهالك رمه
مديول من اسموم بلاه يوم اعناده
...
جاهد ابكل جساره
عليه يشهد التاريخ بللي داره
عليه الثنا والقول موش اخساره
شهيد بطل مفتخرين بيه احفاده
فارس نوا درب الجهاد اختاره
دون ليبيا ناضل ونال شهاده
ومعاه من ضنا وطنه اجواد عصاره
فرسان ليبيا يوم العناد اسياده
صناديد لخشوم العدو كساره
جوارح احقوق ابلادهم رداده
من كل القابيل هل عنا وكباره
من حدها لا حدها يا ساده
وهل نجع توقد ع المعالي ناره
اسماح الفزع يوم السبيب تنادا
ركابة اللي عاتي قجوج مساره
انشال ديه يزارق وراه رشاده
وهل شيخ عالي صيت زين ادباره
كبير عقل عامر يعجبك ميعاده
وهل فارسا يفزع العطيت جاره
وايقول حس عللي دمعته بداده
كسابين للغرّه وللخوّاره
الها دوم فى دارالعفا رواده
وانصلي عللي طيبات اسراره
ونسلم عليه المصطفى بزياده
امحطم اصنام الشرك دك اوكاره
خير من اختاره ربنا لعباده
...
فارس شهير اسمه عظيم اجهاده
ما من ثنا جابه ابلطش ازناده

...