مــــــــــن أنــــــــتـم ؟

من أنتم ؟


يا من اتقول من أنتم ومن ايّن فييّه
اخدعوك هاللي قالوا شوي جرذان
نحنا ضنا صابر واسم امنا ليبيه
واولادنا عصاره ما طاقهم جبان
علمنا اهلال ونجم يضوي ضيّه
مكتوب ينقرا احمر ع السيسان
يرفرف فالسما عالي علي صاريه
او في كل دار ومدينه لها ميدان
او في كل قصر عالي على عليّه
او في كل وادي من جملة الوديان
او في كل قريه ونجع لبواديه
او في كل كوز رمله من الكثبان
او في كل معبر من احدودنا الدوليه
من تونس لمصر واتشاد والسودان
يكيد العدو عطبك عليهم جيّه
انجوه قاصدينه قصدة العدوان
يحاموه فرسانا ما لهم عديّه
كيف البحر كيف سيلة الفيضان
كيف الجراد ايجوك ضبابيه
كيف ناس ماهم ناس هم من جان
كيف الرياح العاصفه القويه
كيف اعصارا زاد طيغوان
كيف اتسونامي ما يعقب شيا
ايخللي العماير دامره ادمران
ايجبوا الفخر من تحت راس الحيّه
صعيب قبل ما يقدر عليه انسان
من أنتم ؟ أنا انقولك احنا ضنا بيتيه
مش مرتزق جايك ايريد احسان
لكن عتبنا كان تسأل فيا
موش عليك عاللي لازمك الزمان
عاللي ايشوف بحالنا الكديه
وراضي وساكت سكتة الخرفان
اللي ايتوه تتواتية الضحيه
ليلة اهلال العيد وين ايبان
واللا ايدروه منشف لكل قضيه
فيه يمسحوا كل شي عفان
الطير ان تعلا فوق م البريه
لازم ايشيلنه م الوطا جنحان
ومهما تعلا ع الوطا الدنيه
صيوره يعاود منبطح بطحان
عتبنا عللي عندهم غيريه
كان الجواب ايبان م العنوان
من أنتم ؟ احنا أمنا رجعه الاجدابيه
تضرب الطبل ايجوك في الميدان
واحنا هلها قالها ثاير بعفويه
جاينك جاينك في عقر دارك مان
من أنتم ؟ احنا العالم كلها جمليه
يدافعوا على احقوقنا احقوق انسان
توا عرفتنا ياك !!!

ياسين ابوسيف ياسين